Morso swazi : Porlwi an Haiku

PROLOG
Kamarad! Frer! Ser!
Mo lavil enn liv uver
Freser mo leker.
*
Zwit dan fon kivet.
Montayn. Lamer. So lakok.
Mo landrwa enn perl.
*
Mo premie larad
Mo deziem enn lerwa
Mwa? Kisannla mwa?
*
Apel mwa Porlwi.
Wi! Mo nom fini par wi
Kan tande. Eblwi.
*
Zepis mo lavil
Li zis de silab. Por. Lwi.
Donn gu mo lavi.
*
Ou’nn rat ou lavi?
Me ou pa’nn rat ou lavil
Ou ki Porlwizyin.
*
Mo lavil so nam
Li mo leker so lamser.
Mo nam so laflam.
*
Mo kontan Porlwi
Pa lor triko ni biblo
Grave lor lapo.
*
Tu so organn bon.
Gran leker. Pa gropumon.
Kapav transplante.
*
Lavil so butir
Inn grefe dan mo surir
Ekler mo figir.
*
Mo lavil natal
So kordon onbilikal
Pa gard dan bokal.
*
Mo’nn plant nu lonbri
Kapav enn zur li fleri
Pu raport kit fri.
*
Surir! Mo burzwa.
Pa rar kuma zanburzwa
Porlwi enn lazwa.
*
Koze. Kas lakle.
Ki to sekre mo gate?
Pa per. Rakonte.
*
Zet lank dan polank
Mo plonz mo plim dan to rim
Nu pu koz parol.
*
Silab li’nn konfie
An haiku ti formile
Lir! Ou pu kone.
*

- Publicité -

 

AANAS RUHOMAULLY

- Publicité -
EN CONTINU

l'édition du jour