Lemond pe krie, pe atann retour a la normal
Kovid pe rann lavi difisil, lemond pe gagn dimal.
Partou kot gete, se la fatalite
Nou pe atann retour a la normalite.
Me la normalite, ki so zistwar
Pou ki dimounn gard otant lespwar.
Normalite vedir perpetwe enn sistem kapitalis
Kot pov vinn pli pov, ris pli ris.
Normalite vedir perpetwe linzistis
E kontinie avek enn lemond materialis,
Kot larzan determinn valer imin
Kot dimounn pou so lintere kapav mars lor so prosin,
Kot valer imin pe depresie
Kouma nou roupi pe depresie.
Normalite vedir, kontinie avek koripsion
Kot lao fer tou pou tap komision.
Dan zot kafe pena triyaz, zot vantar
Zot koupe, transe kouma tazar.
Normalite vedir linegalite kontinie fer ravaz
Pou ki bann lao kapav kontinie fer netwayaz.
Mantalite pa pe sanze, pa pou sanze
Pe atann Normalite pou kapav kontinie kraze.
Moonsamy SUNASSEE