Stelio Pierre Louis (Rodrigues)
Zoli kouman bingali
Zoli kouman bingali oh
Zoli kouman bingali kan sezon la vini
Met mo lam an foli
Met mo lam an foli oh
Met mo lam an foli, la sezon bingali
Kouman lapli lor fey tol
Dan tapaz ki mo paz tournin kouman fol
Mo plim grat grate, gazouye, fouy fouye
Enn poezi perse kouman zi mwazite
Me mo inpasian pou konsonm sa zafer bien zite.
Mo leker fonn, zot dir mwan fonn ker
Mo leker pou enn fanm
Dan mo pake kart li enn fanm ker.
Mo lespri fini sou, enn kout foud
Mo santi li bez mwan enn kout koud
Mo lapo zom drese, mo pa prese
Pli pir ki shakespear mo respir enn bon kou
Mo lis so bann vers, mo santi ki li enan enn bon gou.
Li enn sedev ki intimid mwan kienn simp manev
So lalev, petiye, petiyan pe tini bann parol fretiyan,
Mwespere mo lapros pa efreyan
Fre mo lekor demann saler so botan
So bote, pann sabote, linn zoli touletan.
Kri san makiyaz, li balie tou regar lor so siaz
So catwalk dan vwazinaz
Inn fini kas detrwa menaz,
A ce soir, mo pe vini lamin lamin san akseswar
Met lamin dan mo tirwar, ki ou tikwar
Ketfwa mo lanpoul ava iliminn sa ti koulwar
Mo disan pe valse kouman delo dan boulwar
Akspete mo randevou, enn ti sanpagn nwava bwar,
Lor ou balkon, kot ou la fenet ti pou parfe
Mo bann silab malgre distans ansorlese par ou parfin
Tir ou brasle, anlev ek soin tou ou fatig
Ekout mo ritm avek mo flow ziska li ranpli ou ladig.
Ou enan valer fanm, pa pe koz zis ou body
Dan bann party ou mem lareine, pou mwan ou pa bizin shake ou booty
Ou linteryer se ou rises, les zom rise san sikse zoli princess
Seki konkerir ou leker ya fer ou so promes.
Fonn ker mo fanm ker
Mo mem to vale, vini mo donn twa to valer
Mwamemn twa promin Eau Vannée
Mwa fer to leker vann vanin, dan lezer
Avek mwan to pou leze
Dan mo kote to pou eze
Tou zafer pou easy
Nou lavi pou enn vakans mem si nou busy.
Komdi sa disc la,
kouman lor enn tablo fam twenn mari latwal
Kouman dan lesiel fam twenn mari zetwal.
Dan mo ti Rodrig mwamenn twa fer mo Tyrolienn, akote kot matant liann
Kouman Jane ek Tarzan noua balanse lor enn mem ti laliann.
Oh sizann
Mo mem to latizann
Nou 2, pandan nou Holliday,
mo amen twa lor mo bekan kouman jony Halliday,
Parski monn fini fer mwan a lide,
Se to mem ki mo pou valide.
Mo pou to remed pandan to lafiev
Dan lanwit mo pou to marsan de rev
Poz to latet lor mo lorye, arya
Tou zafer zis nwapiye karya
Enn ti dife dou anba to soya, penan soy la
Parski toultan monn anvi fizionn mo sega tanbour ek to maloya.
Tap lor to ti kes, zwe to laguitar
Kares to difil ek tandres
Bat mo triang fer tranble to sinbal dan sa sinbioz, grandioz..
Dan nou sinplisite
Enn bor lamer, sapo lapay ek ti dite
Pa bizin ki to met twa dan souvetman
Zoli kouman to ete, to fini rann mwan sou betman.
Fonn ker, mo fanm ker
Dan mo pake kart to mem mo koudker
Mo res anpik pou mwan to kont plis ki las pik
Vini nou pik enn sega tipik okler de linn
Oh celine, pa deklinn mo kout plim
Enn teks damour, enn teks sansiel,
Enn teks sanse
Enn teks sansek romantik
Se pa enn teks sansire
Me enn teks ki so sans mo asire
Pou fer twa transpire.
