SANDRINE RUSSIE BEAUHARNAIS
Mo santi mwa pe anvole
Lao dan enn lesiel etwale
Kot mo ete ?
Ki’nn arive ?
Mo santi mwa perdi
Kriye pa kriye
Sa pa pe sanz nanie
Monn tase kot mo ete
Silteple twa ki pe lir mo panse
Esey ed mwa konpran ki’nn arive
Tou finn pas telman vit
Ki mo mem mo pa’nn gagn konpran
Nanie pa ti koeran me pourtan
Dousman dousman tibout tibout
Souvenir ti pe revini
Vit,boutey kase, koltar…
Band zonn, sak nwar, lapolis…
Enn loto ek mo moto… mwa
Zordi kan mo finn leve
Mo mama finn donn mwa mo manze
Linn dir mwa
Fer atansion bann danze
Ki mo kapav rankontre
Kan mo pe vwayaze
Samem ti dernie mesaz
Ki mama finn pase
Kouma monn sorti lor sime,
Enn loto finn debouse
E se a sa moman-la
Ki mo finn retrouv mwa pe anvole
Lao dan enn lesiel etwale
Twa ki pe lir mo panse
Pa bliye ki larout li danzere
Pa bliye ki to pa tousel kan to pe roule
Mo pe al an pe
Me mo espere ki mo mesaz finn pase