Soy la trapé
— Éta Ti-Louis ki position ?
— Ki position ? Laquelle position to oulé, gauche ou droite ?
— Ti-Louis, garde to calme, kifer to pé excité koumsa ? To kouma dire enn tigre en cage.
— Pas koz tigre ar moi, to pou fer moi népli en position la.
— Sa kalité la do Ti-Louis ? Zafer bien pas bon alors.
— Ayo, mo croire depuis Clark Gable fine passe par l’imposte et ki li fine prend place St-Pierre, soy la trapé.
— Manière mo trouvé, dépasse trapé. Soy la kouma dire Ourite Malice lors brizan. Kot fine trapé péna largué.
— Ki to pou dire sa boy to fine trouvé la ? Ek Tha Tiger to fine rencontré dans zistoir Aladin. Mo dimann moi kot to pou alle fini sa.
— Ki Ek Tha Tiger to pé causé, limem ki lors photo la ?
— Limem ta. L’homme de toutes les situations ou si tu veux l’homme de Momo. Kan The Rock la, li ti la. Kan Innoncent IV la, li ti la encore, kan Clark Gable fini, la aussi li la mem. En plus li dans photo de famille tout. Tann dire li avec Bruce Springsteen bann grand disciple de Bacchus. Zot l’ardoise bien lourd kot Apollo mo tann dire.
— Mais Ti-Louis to pé kozé, kozé koumadir martin lors colonne. Mais péna naryé contre zot dans temple. Conclave, ki arrivé pas joindre, pas causé ? Pas prend décision… laisse allé mem, koumadir dilo lors brède sonz. Pé garde zot même.
— To pas kone sa kozé ki dire quand déhors koz boukou, mais andan zot dal n’a pas cuit ?
— Ti-Louis, to rappel Clark Gable ki ti dire ? Nou pou sans pitié
— La mo frère, limem ki fer pitié la…