« Zordi, li vinn montre ki manier ti ena enn konplo par lopozision, pou servi kadav enn dimounn, Kistnen, pou fer politik. Zordi nou’nn trouv manier lopozision inn manipil enn pov madam vev, pou fer bann fabrikasion e pou fer bann fos alegasion. Ki pa’nn dir kont Yogida Sawmynaden ? E ki pa’nn dir kont momem ek Mme Dookun ek le gouvernman osi. Inn akize de tou bann non e mo bizin dir osi, reperkite regilierman par serten lapres a gran tit pou fer sansasion. Tou sa bann foste la nou’nn bizin sibir sa, pandan tou sa letan la.
« Kan nou’nn get ki kantite kestion inn poze dan parlman. E dernier en dat, par lider lopozision, Shakeel Mohamed, avec so PNQ lor zafer Kistnen, Kistnen Papers, bann foste, bann fabrikasion, bann manipilasion. Seki pli tris, se ki manier zot inn anbobinn li, zot inn manipil li, zot inn met bann mo dan so labous.
« Yer dan lakour li ‘nn vinn dir, ki’nn fer li zir bann lafidavi, kot ena bann foste. Zordi kan rann zizman, kot lopozision ti été ? Zot inn kit li tousel, zot inn kit li ater. Samem montre lopozision. Ki kalite zot ete. Servi dimounn, fer politik lor kadav dimounn. Mo pe pans sirtou Yogida Sawmynaden, seki li’nn pase, sa tretman li finn gagne, pa selman par lopozision, me osi par lapres.
« Al gete ki bann tit ki finn ena tou le lon. Se ki linn andire, li, so madam, so bann zanfan, so lafami, so lantouraz… Zordi, seki mo ti pe panse pou arive, finn arive. Kan finn trenn li lakour, avek bann akizasion bankal. Mo’si monn deza pas par la.
« Nou pou kontinie travay e lopozision pou kontinier zet labou. Tandi ki mwa, seki mo dir, mo ena bann fe mwa. Zordi nou pe koz lakour. Ena enn misye, tonton sigar. Li pe trenn so kes devan lakour avek so bann pwin bidon, pou ki pa kapav ziz li dan sa manda-la.
‘Kan pe dir sov pei, pe dir sov limem. Koumsa, dime, il pe kalkile, vinn PM, lerla kapav sov so kes. Dimounn selma pe trouv vre vizaz lopozision. Zot pou demaske de zour an zour. Ena bann zafer ki momem mo pou montre pou demaske zot e ena lezot zafer, zot pou demaske zot par zot mem.
Nou nou ena enn travay ki nou bizin kontinye fer dan lintere pei ek popilasion. Sirtou dimounn bizin kone kot laverite e kot foste. Ena lanket pe fer lor lamor Soopramanien Kistnen. Nou premier ki anvi kone kinn arive. Kistnen ti mo azan. Ena telman pou dir lor azisman serten dimounn me mo prefer retenir mwa.
Kan mo tann Shakeel Mohamed ki kalite koze ti koze, dayer linn fel ek so bann PNQ. Dan PTr mem pe dir sanz li. Zot pe avoy enn lot tenor-la. Mo pare pou li.
Konsernan investitir Yogida Sawmynaden pou prosenn eleksion, nou pou gete an tan e lye. »
