Dr Jimmy Harmon
Dev ti anons nou ki li pou kit nou biento. Li finn antretan resi zwenn dimoun ki bizin, pas mesaz ki bizin ek donn so vizion pou nou pei. Finalman, gran zour-la finn arive. Mardi 7 Novam aswar ver 23.00 zer, Per Alain Romaine anvoy enn mesaz ki dir nou ki kamarad Dev finn kit nou ver 22.30. Kan mo resevwar sa mesaz-la, se avek tristes me dan enn gran serenite ki mo finn akeir depar Dev. Mo panse Dev inn kit nou pou enn lot lavi ek enn lot 
mision ki res touzour enn mister pou nou ki viv isi lor later. Dev ti souvan koz « avatar » ar mwa ek bann kamarad avek ki li ti partaz so spiritialite dan lavi. Dan Indouism, « avatar » se enn mo ki vedir ki Bondie parfwa pran form imin pou gid ek kondir limanite. Pou Dev, Krishna enn « avatar » dan Bhagavad Gita. Li dir osi ki Zezi enn avatar ek mem Pap François. Pou mwa mo rankont avek Dev lor sa later-la finn inpe sa simin lor lekel enn Gran Lespri finn gid ek kondir nou toulede pandan bann refleksion ek travay ki nou finn fer ou esey fer pou nou pei.
Mo anvi partaz zordi sa semin ki mo finn fer avek Dev. Mo dir sa san vantardiz ek avek imilite, parski nou rankont finn kouma diskision ant filozof Socrate (profeser) ek Platon (so zelev), mem si mo lwen pou kapav konsider mwa kom Platon. Souvan mwa ek Dev kan nou pe koze ek diskite, nou ti trouv komsi enn lot filozof ki apel Diogène ki aparet parmi nou. Dan listwar, Diogène touzour pe marse avek enn lalamp kinke dan so lamin pou rod sa vre imin ki viv lor later.
Morisien
Nou tou salye Dev pou so kontribision dan lavansman langaz Kreol ki li ti oule nou apel « Morisien ». Mwa ek li finn gagn bokou diskision lor sa term-la kan nou ti bizin fer avans langaz Kreol dan lekol primer. Malgre so profon konviksion ki langaz-la bizin apel « Morisien », li finn finalman dakor pou ki kan li rant dan lekol primer kouma enn lang opsionel nou bizin apel li « Kreol Morisien ». Me pou nou ariv tom dakor lor la, nou finn fer depi 2004 a 2010 enn long larout diskision.
PrevokBEK
Tou Morisien bizin konn Dev. Sirtou si nou vinn depi enn fami klas travayer. Mo granper ek mo papa ki ti travay dan dok zot ti sa zenerasion ki finn konn konba Dev, MMSP ek MMM dan bann lane 70. Se koumsa ki mo finn toultan tann koz Dev dan lakaz ouswa trouv li dan lagazet. Alor kan an 2004 mo zwenn ar Dev li ti enn « big event ». Mo ti lerla pe travay kouma Project Manager Pre-Vocational Education (PVE) lor kontra dan Minister Ledikasion. Sa lepok-la Minis Obeegadoo ti pe pas lalwa pou rann ledikasion obligatwar ziska laz 16 zan. Alor Minis Obeegadoo aprann dan lagazet ki Bureau de l’Education Catholique (BEC) pe introdwir PrevokBEK, enn program literasi ek nimerasi ki finn monte par Dev Virahsawmy an Kreol pou bann zelev Prevok. Kwensidans gouvernman sanze ek malgre ki nouvo Minis pa ti dimann mwa lev pake ale, mo desid pou retourn ledikasion katolik avek ankourazman Per Herve de St Pern ek Daniel Merven.
Mo retrouv mwa alor Project Coordinator pou PrevokBEK. Alor avek enn lekip dinamik profeser dan segonder nou demar sa travay pionie kot nou fer Kreol vinn enn size ek osi servi li koma mediom pou matematik ek sians. Gras a travay bann profeser, nou resi devlop enn sistem bilengism Angle-Kreol Morisien. Dev pou devlop lerla tou enn seri materyel formasion pou bilengism Angle-Kreol Morisien. Open University pou premie institision iniversiter ki pou ofer sa formasion-la a bann adilt.
Afrokreol
Kontribision Dev na pa zis onivo langaz Kreol. Me li osi devlop bann konsep kouma AfroKreol, EuroKreol ou IndoKreol. Sa bann konsep-la li amen nou konpran konplexite langaz ek lidantite. Dev finn sirtou pran pozision ek angazman piblik pou kominote Kreol dan Moris. Li ti sirtou krwar dan kapasite bann Afrokreol ki plis marzinalize me mazoriter dan group etni Kreol pou lavansman zot sitiasion. Pou Dev « Afrokreol » pa forseman enn manb kominote Kreol ki seve Afro ek ki nwar me li sirtou enn kikenn dan sa group-la ki ena sansibilite pou langaz kreol ek pans an kreol. Se koumsa ki Dev finn osi kontribie bokou dan travay tradiksion Nouvo Testaman ek Psom avek Sosiet Biblik Moris. Met Parol Bondie an Kreol finn so manyer kontribie dan emansipasion kiltirel bann AfroKreol ek mem bann EuroKreol, ki plis ena sansibilte frankofonn me ki aliene dan enn sertenn fason.
Maritime Republic of Mauritius
Enn lot konsep ki Dev tousel finn kree se « Maritime Republic of Mauritius » ki pa zis enn lot manyer donn nom nou pei. Par Maritime Republic of Mauritius, Dev pe dir ki nou bizin apiy nou lor Repiblik Moris kouma enn arsipel maritime ki regroup Rodrigues, Agalega, Sagos ek lezot zil. Li sirtou demontre ki Moris na pa zis enn ti zil me ki li ena enn imansite lespas maritime (2.3 milion kilomet kare) ki bien ris an term resours. Se sa konsep-la ki ofet ki amen devlopman itilizasion term « Blue Ocean Economy ».
Paz anvole
Akoz sa mo dir ki avek depar Dev, li koma enn paz ki finn anvole dan lanatir. Se enn paz ki ena deza bann mo lor la, me lor lekel ena ankor plas pou nou kontign ekrir. Tou bann dimou ki ena gran leker ek anvi travay pou boner limanite kapav azout bann mo, bann fraz, bann paragraf lor sa paz ki Dev finn komans ekrir. Anou kontign bann parol-la dan refleksion ek aksion avek Dev.
Dr Jimmy Harmon
