Kavinien KARUPUDAYYAN
ou finn trouv lizour dan godi montagn Jurançon
kalandriye ti montre 28 me 1923
ou papa ti kit later kan ou ti ankor dan vant ou mama
se Li, fam kouraz
kinn deklar ou Leta Sivil
ek ki finn grandi ou
ou finn siz lor ban Lekol ziska Segonn
parski sa letan-la lavi ti dir,
ou ti bizin sarye
ou bann frer ek ser dadak
pou al kit lekol
letan ek mwayin pa ti permet pou trap plim ek kaye
ou ti bizin travay dan karo, trap zouti pou desinn later
gran-gran rev ki ou ti karese pou dekouver Lemond tom dan dilo
larm lizie ti fer larivier kan ou ti rakont sa lepok-la
malgre tou difikilte
malgre ou sezour kourt dan Lekol, tro kourt mem
pou lir Franse ou ti trase,
mem si Angle ti res touzour enn langaz etranzer
toule tanto anba gran pie badamie vilaz apre ler travay
ou asam ou bann lezot kamouad
koz-koze ti vol dan lezer
ou ti lir lagazet mo par mo, fraz par fraz
partaz nouvel depi isi ek lot kote brizan
Politik Pei, Lavenir Pei ti osant deba
Politik ti ou dada
kat kwin moris ou ti al miting
ou ti ape sorti bomatin
pou ou gran garson pa trouv ou
premie dimounn size dan bis salad gato pima dan dipin
Goodlands, Flacq, Rose-Hill
ou finn lor koltar
ou ti ena lespwar
ou ti krwar dan enn landime meyer, enn lavenir meyer
lager dan Sri Lanka ti kas ou leker
sak fwa sa ti mansione dan lagazet
ou ti boulverse ek ou ti dimann
ou ti zanfan ki pe deroule dan Lanka?
ziska dernie ler
ou ti pe rod enn revolver pou al lager defann
dimounn ki ape soufer
kitfwa se akoz
ou pa ti kapav santi loder
linzistis ek dominer
inpe parey kouma kan ou ti pe travay dan simtier
bel soley midi laswer pe koule lor fron
patron koz brit ar travayer
fer ou sap lor kal
ou ti lev lavwa pou fer respekte ou drwa
malgre ou segonn Letan Lontan sistem Angle
Ledikasion so valer ou ti kone
ou finn trime, al lapes ourit,
travay 4 zour a Paris, dan simtier, nouri zanimo
tousala pou kapav anvway ou zanfan lekol
zot finn rann ou fier sakenn so manier
tou ou zanfan, ti zanfan, arier ti zanfan
finn gard ou loner
Dokter, Profeser, Inzenier, Poet, Labourer,
Dan lotel, dan biro, dan lekol, dan simtier
zot kontinie travay dir transmet ou valer
dan lamal memwar
ou portre ankor flote
mem si 15 banane fini traverse
depi ou finn al tous lipie kreater
enn 23 oktob 2008
toule bomatin ena nek pou ferm lizie
pou trouv ou, tann ou lavwa ek ou riye
sakenn gard ou dan leker dan so manier
atraver foto nwar blan, atraver bann obze
kouma ou bisiklet Phoenix
ki ou ti aste segonn hand
plis ki 80 banane desela
kouma zoli koki ou ti donn mwa pou garde
kouma souvenir ou latasman ar dilo
pandan ou lepok dan lamer
me ou kontinie viv ousi sirtou atraver zistwar
ki ou ti kontan rakonte
sinbol enn lavi bien ranpli malgre tou
siklonn ki ou finn traverse
“mo finn konn lapes gras a lezot gran peser
ki ti montre mwa kouma gete, observe ek bomatin
mo ti pe fini ale pou lapes ourit avan lezot ziska
zot ti pe kriye mwa move madras akoz mo rapidite!”
ena apel ou Bolom Marday, Ton Marday
ouswa Ane Marday
pou mwa ou pou toulezour ek touletan
res Tata Marday
enn granper ki lavi pa finn donn ase
letan pou kone
me letan mo finn pase ek ou presie
ek ase pou dir enn lavi antie
atraver lizie lezot mo esey tras zistwar
ou lavi pou konpran ki ou ti ete
enn bouke fler pou ou santener
Avek tou mo lamour.
*(100 banane)
Mooniapen Nairoo Karupudayyan(1923-2023)
