De mem sours, zom zwir lakreasion
De fors psisik, provok mons pilsion
For, feb natir, nouri, sem ladivizion
Ki’asezonn vizion, ver destriksion
Si o-nom Bondie pe liber fraka
Kan get arsiv lamerd, an ama
Depi premie letan, san traka
Beh, mo sir, ki nou tou pagla
Akaparer, si swaf’ek teritwar
Redi servo, ki’anpli pouvwar
Pou larmoni, efrit lespwar
E, dan letan, nwarsi listwar
Kan evalie bilan dekadans
Limoral, fil priz an avalans
Lavi viole ek prop konesans
Ek lodas, pe flat vid rezilians
De bann arsenal foli, plin larzes
Lager anpwazonn nou freser teres
Rwinn admirab bon sans, ek sazes
Finn angres lager santan, san sesres
Debi dernie siek, ek so de mons lager
Tia krwar, zom apre, pou viv bonimer
Elas, so natir finn permet, fofil lanfer
Ki tou manier, sakouy gras nou later
San konsians, ek viril laflam, nikleer
Prostitie lamer, later, ousi pov lezer
Mem dane, pe’oule vinn propriyeter
Ziska lamourprop, eternel frontier
O-nom pouvwar, zom, san dinite
Anter lestim fraternel, ek lamitie
O-profi pwisans, kriz reos degre
Depase, later tonbe, konsterne
A soy piti dimin, to pret koudmin
Fas douler ek soufrans, to anodin
Pou kares zour prosin, to res sibilin
Kifer to lespri, leker, ranpli ek venin ?
Bann gin, kalkile par desider, mortel
Ki’oze lor pasrel lager, ris zot bretel
Anvenim deza, nou drol boner, frel
Ki dimin, va fini kouma vie dantel
