Pou Dir Mersi
Saraswati finn tranp mo plim
Dan enn polank kouler siblim;
Vishnou finn ranz fraz
Morisien
Ar douser lekleraz lalinn;
Trimourti, Tridevi, Zezi
Finn aroz lavi ar sennbim;
Mo finn konn lamour, lamitie,
Boner, sekirite, lestim …
Mem si vieyes ek maladi
Bes mo bobes, li pou enn krim
Bliye mo devwar lezitim
Desinn sourir mem enpe dim.
(I have been given so much
that I am duty-bound
to give back as much
if not more
thank you my good Lord)
——–
Prefer enn bon kout hahaha dan nou prop otavarima
Dan mo vilaz kot tou dimoun
Zot lavi dous toultan dan
goun
Ti ena enn bien vie tonton
Ki ti prefer so vie kannson
San edredon mem an-niver
Kan partou dan nou liniver
Freser ti fer gagn tarrtarri,
Beriberi, attarriki!
So bann vwazen ek so fami
Ti kwar zame li pou’al dormi
Me kan li ti tom bien malad
Panik ti rant dan bol salad.
Tou dimoun ti vinn gran
exper
Dan domenn
dokter-enfermier.
Zafer ti vinn sitan golmal
Ki longanis ti foupamal.
Tou dimoun ti kont medikal:
Bann imortel pa gagn lagal.
Li pa malad! Zis ensomni!
Li pe megri parski li ti
Anvi vinn akter sinema:
“Natakwa ba, simema ba”!
Zes touy konesans, mo bayo!
Li fer sinema do matlo!
Me kan vwazen ek so fami
Ti koumans konpran maladi,
Ti bizen rod boukemiser:
“So latet dir! Li tro fezer!
Finn dir li al get enn swayan
Me misie la deklar savan.”
Personn pa rapel, kisannla
Premie ti dimann tousala.
Dan mo vilaz, zot tou konn
tou,
Apart ekoute. Samem tou!
Dev Virahsawmy
