ZAINAB SOYFOO
Sali rouz anba mo lipie,
fey tol lor mo latet
douz dibwa bord dan foye,
mo dadi rap zalimet
pou sa swar-la so reset:
Farata, masala kari zak…
Mwa ek mo frer
konplis dan tou lasos,
louke depi godam,
parey kouma lay
kan trouv laflam.
Mo frer get mwa, mo get li,
mo les li al avan
mwa mo swiv li…
“Dadiiiii”…
Mo dadi
si zot pa konn li,
mo enn so fotokopi:
Meg kouma baton zalimet
So blouz de fwa so lekor,
So zip balye lakour,
so seve ti pas dan siklonn,
so latet kriye o-sekour.
Ant so de lame,
dal gotni roule.
Lor ros masala,
baba ros kari roule:
pa ti bizin triang, ravann, maravann,
ti bizin zis tilani, lay,
zoyon, zinzam…
Kitchi-kitchi-kitchi-kitchi-kitchi…
Enn refrin dan mouvman lekor,
enn son ki rezone dan mem lakor:
Zip-an-ler,
kari poule vann-vane;
ti-pima kraze,
misie kanel kas lerin;
Divan-deryer
li rantre siro tamarin…
lamin drwat, lagrin methi,
kole-sere, lagrin moutard.
ala laflam lor lapis masala!
Tawa pe sofe,
tou loya swiv lagam;
farata gonfle,
tou kriye ‘vire-vire madam’.
Fann lafarinn, teign radio kaset,
dan so lakwizinn, mo dadi ki sef lorkes:
Kouyer, fourset, deksi, karay,
li fer tou desann, giring-garang…
Ala git gawai lor lapis farata!
Enn parfin kari zak monte,
mwa ek mo frer fini bliye
ki mama pe atann nou lakaz pou manze.
Sali rouz anba mo lipie,
Fey tol lor mo latet,
lor enn ti ban nou ti asize,
lasiet emaye dan mo godi,
mo goble dilo lor sali,
lavarang ti nou pale
kot lalang aplodi so bann vedet.
Kouma deser,
ti’ena enn zistwar granmer:
lepok granper ti al dan lager mondial,
kan gran manze ti maniok, patat,
violet ek diri may…
Mwa ek mo frer
zorey an ler,
lizie pa oze bate,
labous res ouver…
Ziska ki dan twatir fey tol,
enn lalimier perse.
Soley kouse bat dan lizie
nou galoupe nou al lakaz,
leker bat dan mole…
katora masala dan mo lamin,
mwa ek mo frer ti fer rele,
parski saemem ki ti nou temwin
ki nou tini ziska lalinn darive…
Ale, ale sali rouz inn perdi kouler
fey tol lor mo latet inn pran lasanser.
Me gras a mo granmer
larizes douz dibwa kontign resof mo leker.
