‘’Enn dan lot, sak zenerasion bizin fer fas so mision: trayir li ou onor li’’ – Franz Fanon
20 Me lane 75
Boukou fler ti fane laba
Boukou frwi nou’nn gagne zordi
Laswer ki ti verse yer
Nouri later zanfan kouler liniver
Soley ki ti’nn leve
Ekler seki’nn kontign lite
Pou ki avek baryer nou fini
avek zouti: lekor, lavwa, lari
Depi 4 kwin Moris zot ti vini
lor pon La Grande Rivière zot ti reini
Zanfan Me 75 rezet soumision
Zanfan Me 75 pa le dominer
Zanfan Me 75 pa mor dan vizion
Zanfan 2025 gard lespwar
Zanfan 2025 manz ar li
Zanfan 2025 rezet divizion
Zanfan 2025 anvi respire
Transpire pou aroz so liberte
Rint lekor
Ki li andan ou deor
Pou manz dapre so zefor
Solider
Parski imin pa’nn fer pou soliter
Parski so leker soufer
Devan douler frer ek ser
Zanfan 2025 rever
Zanfan 2025 debrouye
Zanfan 2025 pa pas diber
Zanfan 2025 pa pas par 4 sime
Zanfan 2025 traser
Zanfan 2025 pa tal lame
Zanfan 2025, aster, isi, prezan
Li pa prizonie letan lontan
So lavi, so langaz, so batman reflet so langazman
Li pran so par dan sanzman
Aprann depi lepase
Avanse, dan transmision lasazes seki’nn diboute
Li sarye listwar so verite
Pa fors lanatir
Vey lor seki viv
Labondans avan: enn fitir
aladeriv
Zanfan 2025 gagn kont
Zanfan 2025 pran kont
Zanfan 2025 refiz sibir
Zanfan 2025 ratrap retar
nou kiltir
Zanfan 2025 lavenir
Zanfan 2025 pa pil anplas
Zanfan 75 inn fer plas
Pou zanfan 2025 swiv so tras
Lionel Lajoie – manb Zenes Militan
