Letan Laparteid ti pe donn bal dan Lafrik di Sid
Zanfan ti tromatize
Fami debousole
son sario metal
gramatin tanto
ti fer leker bat dan mole
bal ondire konfeti vol dan lezer
bate, touye, pietine
mare rouz danse lor sime
dram imin, dram malsin
Letan Laparteid ti pe donn bal dan Lafrik di Sid
Zanfan Pei ti san lespwar landime meyer
Nwar-Blan/Gran-Tipti/Kapitalis-Ti dimounn
Zanfan Bondie divize
Lape? Ki Lape?
Lape ti enn mo san Lidantite
enn mo ki ti pe zwe kouk dan diksioner
Letan Laparteid ti pe donn bal dan Lafrik di Sid
lerla mem gran lespri rekonsiliater kouma Mandela, Tutu, Biko
dir inn ler pou kriye ase! ase! ase !
Zot deside pou size lor latab fraternite ansam ek saki
Pou esanze, koze, diskite ek frikas lide
Ek ramenn lakorite
Tal lame lot kote
esey konstrir pon
kre Lamitie sinser
Pou ki fler Lape fane
ek tras enn nouvo sime
Pou ki pli zame koz nou bann, zot bann
Pou ki Later respire
Desmond Tutu,
Zanfan Later Mama Lafrik
Zanfan Laliberte
Zanfan Laparteid
ki pa finn kile
Tonbe leve diboute persevere
Pou amenn
Enn Lafrik di Sid libere,
enn Pei reve
KAVINIEN KARUPUDAYYAN
