Cindy Clelie,
pu Muvman Liberasyon Fam.
Laplipar zenn ki tom amure e desid pu marye krwar li fasil. E dan laplipar ka, li fasil.
Dayer, buku zenn sirman konsyan, ubyin ti devet konsyan, ki Konvansyon Iniversel Drwa Imin 1945, ki Leta Moris finn siyne kan li vinn Indepandan, li dir klerman ki, “Zom ek fam laz adilt, san limitayson ras, nasyonalite ubyin relizyon, ena drwa pu marye e pu fond enn fami”. [“Men and women of full age, without any limitation due to race, nationality or religion, have the right to marry and to found a family”.]
Me, kan u al lor sayt biro Leta Sivil [csd.govmu.org] u pu soke lir konteni lalist dokiman ki enn kup bizin prezante, si enn konzwin ladan pa finn ne Repiblik Moris. Sertin sa kondisyon paret pe dekul depi Immigration Act 2022, lezot pa kler kot sorti:
“… e) Certificate of character/morality (Original) from country of residence and issued by the police authorities (issued within the last six (6) months) + 1 photocopy; (To be duly Apostille from the country of issuance);…
“f) A Valid Work/Resident permit (applicable to expatriates) + 3 photocopies
“g) Proof of financial means ;( contract of employment or recent bank statement or recent salary slip – last 3 months) + 1 photocopy
“h) Medical certificate attesting that applicant party does not suffer from any infectious or contagious disease. (Validity 3 months)”.
Alor, u pa kapav marye kikenn ki pena travay, ubyin ki pena sifizaman larzan (financial means), ubyin ki pena permi travay deza, ubyin ki pena sertifika moralite, e fond enn fami isi. U pa mem gayn drwa pu marye kikenn si li ena maladi kuma HIV, herpes, tiberkiloz, ant-ot.
Lalwa li-mem mem dir u pa gayn drwa marye si u finn tom amure ar enn dimunn ki pa ti ne isi e lerla res isi ar li, si zame Premye Minis deklar li, ubyin finn deklar li, enn “prohibited immigrant”. Ala definisyon kisannla enn “prohibited immigrant, dapre Immigration Act 2022:
“Section 5 … the following non-citizens shall be prohibited immigrants and shall not be admitted to Mauritius, or whilst being in Mauritius, remain there –
“(a) a person who suffers from an infectious, a contagious or a communicable disease;
“(b) a person who has been convicted of, or admits having committed, a crime which, if committed in Mauritius, would be punishable by imprisonment for a term of not less than 6 months;
“(c) a prostitute …;
“(e) a person who is, or is likely to become, a charge on public funds;
“(f) a person who is a chronic alcoholic;
“(g) a person who is a drug addict …
“(k) a person who, from information or advice which in the opinion of the Minister is reliable information or advice, is likely to be undesirable inhabitant of, or a visitor to, Mauritius;
“(l) a person or class of persons whose presence in Mauritius, from information or advice which in the opinion of the Minister is reliable information or advice, is likely to be prejudicial to the interests of defence, public safety, public order, public morality or public health; …
“(n) any other person who, from information or advice which in the opinion of the Minister is reliable information or advice, is or has been conducting himself in a manner prejudicial to the peace, defence, public safety, public order, public morality, public health, security or good government of Mauritius.”
Ena tusa baryer a maryaz avan-mem ki u marye.
Dan Muvman Liberasyon Fam nu denons enn Guvernman ki, anmemtan ki li ankuraz zenn, laz maryaz mem, al etidye lot peyi, anmemtan ankuraz “emigrasyon sirkiler” pu Morisyin al travay deor, anmemtan ankuraz tule lane par milye zenn al travay lor bato krwazyer, anmemtan literalman “vann” rezidans ek sitwayennte ar milyoner, ki lerla sa-mem Guvernman li vinn met baryer kont marye ar dimunn ki zenn zwenn pandan li pe etidye ubyin travay. Nu ule drwa pu marye libreman e pu viv dan nu pei.
Zordi nu bizin atann 300 zur apre enn divors pu nu re-marye, si u finn deside res ansam lor later Repiblik Moris? Pa zis sa, u bizin prodwir enn tes groses negatif osi, avan u gayn permisyon pu marye sivil? Me, depi kan u pa kapav marye akoz u ansint?
Lepok lesklavaz inn aboli. Nu nepli betay kontrole par Leta ek par patron. Nu denons usi sa Guvernman ki dir li “caring”, me ki azir dan enn fason diskriminatwar kan li rann maryaz difisil pu Morisyin ki amure ar enn dimunn ki ena enn maladi, sipa enn adiksyon, swa ki finn deza kondane.
Kot nu pe ale, kan nu bizin dimann nu konzwin, “Montre Guvernman to kazye zidisyer pu nu kapav marye? Montre Guvernman to prev mwayin finansye? Montre Guvernman to papye medikal ki dir ki to pena maladi infeksye?” Eski li kapav finn vinn vre ki nu bizin kurbe, rod permisyon Leta, pu kapav viv marye e viv an-kup isi? Si nu pena ase larzan, sipa nu pena travay, eski nu pa kapav tom amure, marye e fond enn fami? Ondire, Guvernman pe azir kuma papa lontan, “Sa garson la enn somer. Abe kuma li pu sweyn mo tifi?” Ala fason paternalis ki Premye Minis pe azir pu sanse protez tifi ek zenn fam Repiblik Moris.
Konklizyon
Kuma lekter kone, Muvman Liberasyon Fam pe amenn enn kanpayn kont plizir kloz sa nuvo Immigration Act depi ki li vinn divan Parlman an Ziyet.
Nu finn deza amenn kanpayn kont nuvo lalwa akoz li aras “drwa rezidans” pu enn konzwin ne ayer, e ofer plito enn “permi” tanporer revokab par Premye Minis nerport kan.
E, nu pe sutenir ka konstitisyonel nu manb Lindsey Collen, ki enn sitwayin Morisyin depi 36 an e ki marye ar Ram Seegobin. Li pe chalennj sirtu enn lot kloz, ki fraziliz mem “sitwayennte” enn konzwin ki ne ayer, e sa asontur menas zot fwaye. Ala ki nuvo but dan Mauritius Citizenship Act dir lor la: Minis responsab Linteryer [Premye Minis] “kapav dan so diskresyon absoli e san furni okenn rezon, aras sitwayennte neport ki sitwayin Moris, si li gayn linformasyon e li, li satisfe, ki li dan lintere defans, sekirite ubyin lord piblik”. [The prime Minister] “may, in his absolute discretion and without giving any reason, deprive any person of his citizenship of Mauritius, if he has reliable information and is satisfied that it is in the interest of defence, public safety or public order”]. Kuma lerwa lontan, li kapav banir enn sitwayin depi so rwayom, san lapel, e san explikasyon.
Nu pu dan Lakur Siprem, dan galri piblik, le 8 Desam ansam ar nu manb, ki aktyelman Prezidan nu lasosyasyon. Kontakte nu, si zame u interese pu siyn deklarasyon komin nu pe prepare kont kloz represiv dan sa nuvo Immigration Act la.
3 Novam, 2022.
