Mo ti invite dan fennsifer bann artis, laba kot zaregne ki ti mama bann modis: Ar so wit ledwa, li trap so zegwi. Ar so difil laswa, li tis latwal ziska minwi…
Artis de natir, li pa bizin ni sizo,
ni lakre tayer.
Li ris enn long lalinn,
li fofile,
li glis lor enn brans,
li sirfile.
Dan so routinn, pwin zigzage;
dan so kadans pwin sinplifie.
Pena masinn ki so egal:
Ki so zegwi, ki so latwal
ki so koutir, ki so detay,
dan so domenn, li ki ti fenomenal…
Lerwa baskour dres so kouronn, koukouroukouuuuu
tou ti bebet fer laronn… koksinel ar so zip apwa,
li’nn pare pou dans polka.
Papiyon anler-anler tourne ar so zip-a-fler, kamaleon makiye
kas kamouflaz,
kourpa ranpe
pous so rebann, ris karapas. Dan kwin feyaz, laroze perle
kouma ti zetwal.
Me dan tousala, Zaregne briye li ki ti fenomenal…
So rob alala latrenn,
kamera klike, li defile lor lasenn, pa ziz li, li pa mofinn,
li kapav pike,
me tou petal ena zot zepinn…
Larenn bann arsitek dres so
kouronn.
So pale ti sispann lor enn brans
pie palmis,
Nouvel vini ki zaregne pe fer zes
ar mous dimiel…
Ala sangat dan fennsifer laba lor
later bann artis.
Zaregne zoli mamzel
met enn paryaz ar mous dimiel…
“Anou fer enn fasafas,
mo gete si tw’ena fiel…”
Mous dimiel koste,
zaregne elwagne;
Li donn dou,
zaregne dir pa gagn gou;
Li amenn polenn,
Zaregne dir “ankor samem?!”… Mous dimiel araze,
li lans so pike,
pou met enn pwin final…
Me dan tousala, Zaregne makrame, li ki ti pli fatal…
So rob alala latrenn,
kamera klike, li defile lor lasenn, Pa ziz li, li pa mofinn,
Li kapav pike,
Me tou petal ena zot zepinn…
