UMAR TIMOL
eski to anvi get twa dan enn mirwar, enn mirwar
ki napa koz manti, enn mirwar ki montre twa ki to
ete, devan sa mirwar-la, to napa kapav sove, to
napa kapav kasiet, li ouver to lam, li expoz to lam
parski Gaza li kouma enn mirwar,
enn mirwar, ki montre twa violans dan leker imin,
zot fi’nn touye, zot fi’nn masakre,
zot fi’nn zenoside,
zot fi’nn anter zanfan vivan,
zot fi’nn anpite, zot fi’nn touy limin,
eski to trouve ki ena dan sa mirwar-la,
eski to anvi kontigne gete ou sa to anvi sove,
parski Gaza li mirwar to limanite,
ki to’nn fer depi ki sa genosid-la inn koumanse
eski to lam inn telman angourdi,
ki to’nn kontigne riye, sante, manze, vwayaze,
kouma dire naryen pa pe arive,
eski to’nn kontigne deklar san konpran,
enn konfli konplike-sa, enn konfli milener
ou kapav mem ki to fi’nn side avek opreser
eski to anvi get twa dan sa mirwar-la
parski sa mirwar-la, li enn prelid,
sa mirwar-la li enn prolog, konpran
mem si to pa anvi konpran, konpran
mem si to leker inn avegle, mem si
to leker inn vinn ros, konpran ki sa ki pe
arive laba zordi pou arive isi dimin,
ki bann fasis avek zot drapo laenn,
avek zot lame ki fer ar disan, pe larg
so tantakil dan nou lavenn, dan nou laser
pou kontrol nou, pou dominn nou, pou aservi nou,
pou zenosid nou
Gaza li nou lavenir, Gaza li nou landemin
dir-mwa, kamarad, eski to anvi get twa
dan sa mirwar-la, si to pa anvi, ale, sove, al
kasiet, me mirwar pou swiv twa, mirwar-la
pou montre twa ki to ete, li pou montre nou
ki nou ete, mirwar Gaza-la, li mirwar sa ki
limanite ete, li mirwar destin limin,
nou destin e inn ler pou to deside
get twa dan sa mirwar-la pou liber twa,
ou napa get twa ek to lam pou ansene,
to lam pou zenoside*
* Sa poem la inn lir par loter dan event Viva Palestina dan Caudan Arts Centre
