Moris enn ti paradi o milie lamer
Kot mem dan liver li donn nou saler
Enn plas ranpli ar valer
Bokou finn lager pou vinn so propriyeter
Ki li Angle ou Franse, sakenn finn investi pou ki
Moris gagn so kouler
Zot finn pran bann dimoun dan Lafrik ek dan Lind
Pou fer Moris vinn enn lil extraordiner
Kan Moris ti gagn lindepandans, zot tou ti fier
Parski nou tizil finn vinn mazer
Anfin li kapav devlop so bann sekter
Li montre so grander ek seki li kapav fer
Me bann politisien inn komans fer dominer
Zot inn fer nou tizil soufer
Bagar rasial finn kas bokou leker
Siklonn Hollanda finn afekte bokou dimoun mizer
Ek lamor Kaya finn met nou dan koler
Me nou tizil Moris finn touzour vey lor nou kouma
enn mama, enn gran ser
Avek so lanatir bien ver
Bann bon frwi ek bann zoli fler
Parfwa si nou mank delo
Pena traka nou ava lav nou linz dan larivier
Moris pe pas dan Kovid
Difisil vwayaz par bato ou bien dan ler
Me zero ka Kovid e nou lespri kler
Parski dan konfinnman noun viv dan laper
Wakashio finn fer nou tizil Moris gagn ankor douler
Me ansam, kouma enn fami,
Noun geri li kouma enn dokter
Moris li enn paradi me souvan nou fer li viv enn lanfer
Nou bizin pa viv kouma viper
Nou bizin viv solider
Ek lit kont bann malfeter
Ki pe gat nou latmosfer
Lame Dan lame
Anou marse
Pou gagn enn lavenir meyer