Si mo donn twa enn gro gato nasional,
mo dir twa partaz li,
sakenn bizin gagn egal.
To pou dir mwa,
li pa posib, li pa realis:
Parski seki pli gran, gagn pli gro,
seki pli tipti, gagn desimal pwin-zero.
Wi, lavi zame ti egal,
ek kouma Jean Paul Sartre inn dir,
on gouverne avec les mains sales.
Me mo pe zis demann inpe lamour prop:
Pa donn mwa manze restan,
pa donn mwa seki’nn reste kan fini partaz kolon,
kouma enn ti koulwar pou al Pwint-Desny,
kouma laplaz Rosnwar ki pou gagn akse,
mo prefer dir “les li”.
Si dan mo leritaz,
zot pe koupe-transe,
fode get zegwi lor balans
kouma enn vole trikaz pe afise.
Dan gato nasional
nou tou nou petriye,
me kan ena pou fer partaz,
bann ki pas diber ki privilezie.
Kanmem komien nou tou nou kontribye,
kan enn pou pas kouto,
sef lakwizinn ki met tabliye.
Lamin sal pa ar dizef, lafarinn,
me ar disan fam-zanfan afame…
Festin dan pla kopin-kopinn,
nou malere,
nouri nou lakrout dipin…
Twa ki twa zom zenes araze,
to pou fini par deperi dan lagrev lafin…
Mwa ek twa,
nou dan mem lake pou gagn gato:
mo pe atann mo tour,
to pe atann to tour,
me lev latet to get lao,
mo prezant twa bann votour:
Bann rapas ki kan tal lezel
koumadir inn met kostim-palto;
bann voras ki telman fidel
koumadir zame pou aret chato…
Lakrem lor lakrem,
seriz lor gato
Zot manz dan to pla,
zot kras lor twa.
Wi lavi zame ti egal,
me kan enn bann inn swazir twa
pou partaz enn gro gato nasional,
nou atann ki to met tou pla lor latab,
pou nou gete si vremem li ekitab.
Me, lafin dimwa fer ale-vini,
nou get gato nasional
kouma bann lepasan ki get vitrinn.
Li diminie, li disparet,
parski kouma zot kone,
seki pli gran, gagn pli gro,
seki pli tipti, gagn desimal pwin-zero.