NAD’N K. MANIKKAM
Lane vini, ale’k enn pons zistwar
Dan latet, dimounn eriz lot lespwar
Memwar mirwar, koz so trale reisit
Ou mem, plor penib oter, bann fayit
Met de kote, montayn regre e remor
Komemor lansantman, dan simp folklor
Sou vie soley, batiz bann nouvo zour
Ek mem labitid, lamor fet lamour
Anbark’ek premie son, nouvo sezon
Renouvle lanbision, mision, vizion
Imortaliz form e kouler bann rev
Promes, zalone san enn demi trev
Liberte, papiyonn linstin bann ner
Krwayan, dir mersi yer, tourn divan ler
Sakenn so bilan, repans lavantir
Resours prezan, sov lintere fitir
La, a-ter ek tou boner ou mizer
Zom, fam, zanfan, fami, a-ker ouver
Ena ki’an roz, ena ek so margoz
Tou manier, nouri zot apoteoz
Douler ou bien-et, ek zot lemosion
Resourse depi lonbri tradision
Mwa, semenn, zour, kares sak ti linstan
Sekinn pase, pa rezwenn, pli divan
Partaz, depi gran larder nou plezir
Tia nouri lantant meyer lavenir
Kristaliz lazwa, an nouvo bonbon
Fer limanite ankor pli mouton
Randevou dan zis 365 soley
Antretan, anou radie tou lorgey
Lor tou paramet, nou drol parkour
Depi liv sakre, fer tou miz-a-zour
Sakenn so lavi, ek sansasion fier
Ouver lizie lor infim sans traver
Latant nwel pe pali koman sandel
Reveyon’si, perdi so natirel
Ki imin rekeyir, an gran silans
Al lwin dan profon larwinn la konsians
Fer sak zour, reviv, ferver Bethleem,
Fasonn douser dimin, an enn lakrem
Sak zour, sezir enn sinser santiman
Konble lavi ek loner bon vivan
Resarz tou simin ki’ankre dan lizir
Donn liniver lasans enn lot sourir
Rekree nou later, enn zardin boner
Efas tou distan rankinn e koler
San ladilter, gard nou simin prop,
Zanfan edit lavi, ek fin amourprop
San ki profi maler, rann lavi dir
Viz nou zenes dan iltim liyn de mir
Anou armoniz fami e peyi
Transport tigit leker dan nou lespri
HapiNiouYea, Bonane, Nouvelan
Ki letan nesan sant nouvo lelan
Revey limanite, ek dign figir
Moul shanti, dan leker, lor tou mizir
Mem lavey, finn perdi so natirel