To sorti lwin
- Publicité -
Zoli destin
Tomem nou lien
Depi lorizinn soufrans
To’nn pran nesans
Dan rezistans
To’nn konn maronaz
Dan to ti-laz
Liberte so laraz
Zanfan vinn gran
Kas to lelan
Pa pou lontan
Lindepandans zot koze
Par twa pase
Sanse linite
Pas dan sok, gagn bon
Konsanti, dir non
Lavi dans lor to son
San twa pena nou
Eg, sale, amer, dou
San twa pa kone mem ki’ete gou
To kouma lar
Sakenn inn amenn so par
To sarye nou listwar
Laont, konplex, mepri
Pankor fini
Ankor bizin liber lespri
Lazwa, bote, lamour
Freser lanwit, saler lizour
To desinn lavi so bann kontour
Depi premie fwa
Nou’nn pous lavwa
To ti la,
Langaz Mama,
Lakaz Mama.