LIONEL LAJOIE
Finalman nou reviv mem zistwar
Zame imin aprann so leson
Bel diskour kan pou tro tar
Fer sanblan rod solision
Dimann lelou vey mouton
Zwe rol fou, fer lekouyon
Kan zafer-la eklat ar nou
Peace, drapo blan, apez tansion
Get lipokrizi bat plin
Araze san angaze
Manze-bwar ziska vant plin
Bann mons ki nou angrese
Dan konfor seki nou pa kone
Seki nou pa dakor nou vote
Dan pares liniorans
Atann lezot sanze
Partou mem deroulman
Atraver bann milener
Mem dram, dekor diferan
Mem film zwe, pa mem akter
Depi ki later later
Lalwa pli for, dominer
Pou Lerwa, pou Bondie
Pou pouvwar, pou later
Zoli Deklarasion
Sanse nou ne egal
Lesiel twa to prizon
Tw’avoy rous, to gagn kout bal
To realite, lager total
Avek koudme bann ki fer moral
Vinteiniem siek
Rezim kolonial
Kik plas limanite bafwe
Partou liberte perdi sans
Nou devwar, diboute
Devan lintolerans
Si nou gard silans
Nou konplis soufrans
Kot ena lokipasion
Bizin ena rezistans
