GUILLAUME SILAVANT
Partou kot mo traverse,
Mo tann koz to koze;
Lor sime, dan bis, dan travay.
Tou dimounn ape gagn zot enn Bhai.
Tou, enn bann spesialis,
Tou ape koz to koze. . .
Ki dan lavil, ki dan site,
Tonn fer boukou figir konfi. . .
Ena pre pou al lazil telma to ape zwe ar
nou trankilite despri.
Me mwa, mo krwar ki nou enn bann korias !
Dan dizef poul, pa kapav gagn ti kanar !
Korona, bann-la pe dir to dan laplas,
Tonn poz enn lapat lor nou teritwar,
Me nou pa per to regar !
Welcome dan Moris !
Nou pa per parski nou pran prekosion !
Nou pa per parski nou, nou napa tou nasion !
Nou, nou sort isi nou ! Nou sort dan Moris !
To krwar nou pou les lanfer rant dan nou paradi ?
To pa kone ar kisana to pe gagn zafer !
Nou kapav pa parfe, me nou mari kontan lavi !
We, to dan Moris !
Nou pa per ! Nou ena mari leker e tou letan
sa fer mwa fier !
Pa vinn badinn badinn ar nou, sinon Zekler !
Nou napa per !
To kone komye azenou ape fer lapriyer ?
To kone ki kantite lamour ena isi, ant nou bann frer ?
To kone ki kantite Bondie ape protez nou later ?
Non… To pa konpran tousala twa Korona….
Twa, to zis enn ti kaser nisa.
Alor pare twa, parski la, to pe gagn zafer ar Zilwa !
Morisien ki la !