SANDRINE RUSSIE BEAUHARNAIS
Rob blan ti fini repase
Papa pa ti pe fini aret plore
So zoli tifi pou kit li pou ale
Mama pas lame
Dan so seve
Poz so zoli kouronn fler lor so latet
Pous enn ti bizou lor so lazou
Deor latant ti fini drese
Kot legliz, enn ti labriz koumans soufle
Laba kot li sipoze fer so lantre
Monper ti pe atann pou donn li so benediksion
Dernie regar, dernie orevwar
So serkey kit so lakour li ale
Yer ti so dernie zour lor later
So bouro
Fi’nn pik li enn kout kouto akoz bann problem konzigo
Zordi se avek douler dan leker
Ki mama ek papa pe akonpagn li ver so dernie demer.
Dan so lavi koup, li pa fi’nn konn leboner
Sa boug-la fi’nn fer so maler
Gramatin kouma leve kout pie li ti pe gagne
Kan dite pa ti ankor pare
Plizir fwa li finn koze
Me lasosiete fi’nn fer sanblan pa tande
Ena finn ekoute ek finn dir li reste
Parski sa boug-la ti to mari marye
Li finn reste
Boug-la fi’nn pran so lavi azame
Zournal finn rakonte seki finn pase
Boukou internot finn komante
« Rest in peace » zot fi’nn mete
Apre zot tou fi’nn bliye
Zordi se so paran ki pe soufer
Zordi mo depoz mo plim
An omaz tou fam ki finn tonb ater
Akoz enn bann lisifer
Ki merit zot plas dan lanfer