LIONEL LAJOIE
- Publicité -
Mwa, mo’nn ne garson
Mo ena gran lanbision
Si mo ti ne tifi
Mo ti pou bizin rev tipti
Mo’nn ne zom
Mo bizin kone
Si mo ti ne fam
Eski mo ti pou koze ?
Mo’nn ne dominan
Mwa ki deside
Ti pou sou lanpriz bolom, paran
Si mo ti dan lot lamwatie limanite
Mo’nn ne zom
Mo fer seki mo anvi
Si mo ti ne fam
Mo ti pou size mo prop lavi
Mo’nn ne garson
Pou marye mwa ki pou pran desizion
Si mo ti enn tifi
Dernie mo ti pou vinn ti pou Papi
Mo’nn ne mari
Lemond pardonn mo bann defo
Ti pou bizin touy mo lekor ek res zoli
Si mo ti ne deziem-lo
Mo’nn ne garson
Enn zour mo pou vinn patron
Si mo ti ne tifi
Enn zour, mo ti pou swazir ant travay ek fami
Mwa, mo’nn ne zom
Pa tigit privilez ki mo zwir
Si mo ti ne fam
Kapav enn zour, mo ti pou leve ek aret sibir