KAVINIEN KARUPUDAYYAN
Lager kit bokou tras lor so pasaz. Bann tras ki mark dimounn ki finn pas par atrosite e li zenere enn lavi antie. Lager sivil dan Sri Lanka finn dire pandan 26 an. Li tinn koumanse an 1983 ek finn pran fin an 2009. Sa fer 9 an ki pei-la an rekonstriksion. Mem si lonbraz lager ankor dan laryer plan, dimounn pe esey efase pou refer. Pou rekonstrir enn nouvo lavi avek kouma sinbol lamour, lape ek linite.
Sa poem-la rakonte ki manyer bann viktim lager finn bizin kit zot lakaz pou al rod refiz ayer avek bann pwin dinterogasion lor lavenir. Poet ki finn ekrir sa se Vairamuthu ki ena enn sansibilite ek enn manyer pou dir bann zafer vremem siblim. So tit an tamul se Vidai kodou engal naadou ki nou finn tradir an kreol morisien kouma Mama Patri, swet nou orevwar.
Mama Patri, swet nou orevwar
Mama Patri, swet nou orevwar
Nou lakaz akot lamer vinn repoze kot so lantre
Lafore palmie! nik zwazo!
Eski nou pou re-zwenn enn zour?
Avek nou sourir ki nou finn kasiet
Ek nou lavi ki nou finn antere ofon nou lekor
Nou pe marse kouma koki vid
Eski sa bann goni-la kapav ranplas godi enn mama?
Mem si nou al dan Paradi, eski nou pou lib
kouma dan nou pei?
Ala pei kot premie fwa nou finn trouv soley
Me ki kote pei kot nou pou ferm lizie?
Nou pe kit zot bann larivier
Nou ava retourne si nou sirviv
Si nou Mama Patri rapel nou, nou ava retourne
Avek larm lizie ki pe fer larivier nou pe salie
later kot nou lonbri finn antere enn dernie fwa
Nou finn perdi nou melodi nwaye par bann zanfan
zot larm nouri par zot douler
Nou finn perdi nou bann souvenir dan lafime
kre par bann bom
Avan nou ti pe alonze lor lili fler, aster-la omilie
lanwit pikan atak nou
Zwazo lamer!
Nou ava re-zwenn si nou sirviv
Lafore, montagn nou ava re-zwenn
si nou ankor an vi
Avek nou, nou traka nou pe sarye
Plis dan nou leker ki dan nou latet
Mama Patri, swet nou orevwar
[Enn tradiksion depi tamoul par Kavinien Karupudayyan]