Si mo garson ti koze
Li ti pou demande kot sa to fi’nn ale
Avek leker kase
Ki mo ti pou dir ki
Mem si to nepli la kot to ti abitie ete
To la partou avek nou
To prezans li touzour la
Mem si nou lizie pa trouv twa
Dan lalimier soley ki resof nou leker
Dan klarte lalinn ki ekler nou sime
Dan gout lapli ki efas tou larm ki pe koule
Dan ler ki kares nou lazou
Wi to la azame avek nou
Ena bann prezans ki pa kapav efase
Bann souvenir ki res azame grave
Bann dimoun kouma twa ki vinn dan nou lavi
Ek zame nou bliye
Mem si mo garson pa koze
Li anvi dir twa mersi
Mersi pou tou seki to’nn fer pou li
Mersi pou lasans to finn donn li
Kan to’nn desid pou komans
To konba
Wi Geraldine, li anvi dir twa mersi
Ek mo’nn anvi dir twa mersi
Mersi pou seki to ti ete
Mersi pou to lamour
Kontign vey lor nou
Nou kontan twa