LIONEL LAJOIE
Letan pa donn letan
Letan al drwat divan
Mo ti ena proze
Ti prevwar tel zafer
Ti fini planifie
Ti zis enn kestion ler
Mo ti pans lavenir
Ti ena lanbision
Mo ti pe trouv mo fitir
Pa ti pe mor dan vizion
Letan pa donn letan
Pa dimande, pran
Mo pou met enn serye
Demin, mo kas batman
Mo aret bat-bate
Demin, koumansman sanzman
Mo pou manz ar li
Zot ava dir mwa
Demin, koumansman enn nouvo lavi
Marke-garde, pa gagn traka
Letan pa donn letan
Letan pa fer sanzman
Ti pou, pa’nn finn
Aster tro tar
Soley ek lalinn
Fer lizour, aswar
Segonn, minit, ler’d’tan, zour
Ritme kadans nou lavi
Demin pa sir nou trouv lizour
Yer inn pase, res zis zordi
Kan nou pou rezwenn
Dernie fwa kot twa, mwa nou ti ansam
Perdi dan lavi so agrambagram
Nou pa ti ankor realize
Kouma li beni nou lamitie
Ti bizin letan pou rekonsider
Seki initil, seki neseser
Twa, to konte, aster mo’nn konpran
Verasite mo bann santiman
Dan to labsans, mo’nn konn to valer
Mo’nn pran konsians seki mo dwa Nou
Kan to pa la, lavi pena saver
Kan to pa la, mo lavi pena gou
Perdi dan mare-nwar solitid
Souvenir fer mwa res solid
Nou bann koze, nou bann moman foli
Fer mwa rapel ki lavi zoli
Dan lanfer langwas ek laper
To sourir mo lalimier
Pe evit dezespwar ek so lamay
Avek vizion boner nou retrouvay
Bliye nou bann lager
Efas seki’nn pase
Pou ki nou viv bann landime meyer
Zordi, nou nouvo zistwar koumanse
Nou pann fer pou viv sakenn dan so kwin
Tousel nou al vit, ansam nou al lwin
Vinn pre, koste ar mwa, ba mwa enn dou
Resof mo leker avek to saler dou
Ale, vinn pre, trap mo lame
Promet ki zame to pou ale
Konble mo ti leker ar lazwa