Zainab Soyfoo
“Eyyyy, ki manier? Ou bien?”
Enn kesion ki nou poze preske toulezour.
Dan mo lantouraz, enn repons komin:
“Zis diabet-la inpe for,
Me si pe kapav marse, bizin dir bien non!”
Nou lekor li parey kouma enn lizinn.
Li ranpli ek bann travayer
kot sak organn ena rol enn masinn:
Leker, li ponpe,
lefwa, 1 rezervwar disan ki detoxifie,
lerin, li filtre…
Tou seki nou konsome,
depi so dipin, diri,
farata, dalpouri,
ek tou nou bann proteinn, vitaminn,
poul, pwason,
fri, legim,
depi dan nou pla
ziska nou lestoma,
samem ki donn nou moter so delwil.
Antie lekor deroul dan enn lord,
ziska ki nou fer gro lizie
kan lalang tape pou rod ankor.
Dan lavenn disan,
glikoz ki deborde.
Pik pous azin,
laparey diabet pe dir lao 6.9…
Me avan ki tousala arive,
anou koumans par pran enn repa ekilibre.
Tou seki nou pran, pran li zis,
pa pran li plis bizin…
Boulo-repo dan enn lekilib,
pa rat dipin-diber gramatin.
Apart scroll lekran TikTok,
anou bat enn kare lor terin.
Lalkol, sigaret, fast food,
ralanti li zsika nou resi met enn frin.
Diabet li pa enn batay ki nou pe lager tousel,
me kouma zot pe trouve isi,
ena enn gran lekip dan Health Promotion and Research Unit.
Zot ki pe raprose ar nou dan vilaz, dan lavil,
pou fer depistaz pou bann maladi non-transmisib.
Dan diabet, mwa ek twa nou pa exper.
Alor, kan nou sorti la,
pa ezite demann konsey ek enn dokter.
Feyte nou karne lasante
Pou aprann lor nou grann dimounn so listwar medikal
parski nou le, nou pa’le,
diabet si vinn dan leritaz lokal…
Kan dimin mo krwaz to simin,
ek mo demann ou, “eyyyy, ki manier? Ou bien?”
Mo pa le tann, “zis diabet-la inpe for,
me si pe kapav marse, bizin dir bien.”
Me mo le tande ki zot pe swiv li pa par pa,
zot pwa lekor ek zot ritm lavi ena enn balans.
Parski kan ariv lafin lazourne,
bidze kapav depans par milyon lor lasante,
me nou bienet depann lor nou ek nou volonte.
Slam by Zainab Soyfoo for World Diabetes Day
