MELANIE PÉRÈS (Maurice)
Fonnker ? Sa mo les sa pou bann-la
Mo pa kapav vinn dir mo koz ar mo leker mwa. Leker mo pena
Mwa mo koz ar mo trip, mo poumon, mo lefwa, mo lavwa…. Mo…
Mwa mo pena letan pou kalkile mwa
Mo pena letan pou admire, pou touse, karese, anbrase
Mwa mo fer… seki bizin fer
Kwi vide, mete tire, trape zwe-zwe, beke rise, large krase… (ppp)
Aaaah pa get mwa koumsa,
Tansion ou krwar mo pa kone ki ou fer
Kan lalimier inn tengn.
Enn sel metie mo’nn kone dan mo lavi mwa, se vann lekor.
Parski mo ti ena swa.
Ou pou vinn dir mwa tou dimounn ena swa ?
Kan ou’nn leve enn gramatin laz diz-an, de bel kalot kado
Laniverser, ou pe bizin poz de zenou a ter
Pa krwar se pou vinn fer lapriyer.
Kan ou’nn leve enn gramatin laz douz-an, dan lakaz pa pou ou,
Ou seve inn kol-kole, ou labous patiak-patiak, ou lekor inn kas-kase,
Pa krwar ti ena bel fet pou ou lavey.
Kan ou’nn leve enn gramatin laz kinz-an, de zak dan tant,
Ou pa kone kisann-la inn met sa ladan,
Ou pa krwar mo ti a pli kontan li ranpli ar de liv legim sipa enn liv mem ?
Lekol mo pa’nn lekol mwa, ki travay mo pou travay ?
Lir mo pa konn lir mwa, me kas mo konn konte.
Kas konte… ki to ti krwar… mo bet?
Mo pa ti ena lot swa.
Apel mwa kouma to oule, lasari, sakal, nam sal,
Tousala momem sa.
Selma to vinn rod momem.
Ar kravat, soulie verni, bel-bel loto, tipti poto to ena la,
To pe fer krwar tomem mari,
Selman dan nwar to vini mem
Me letan aswar mo ler vini, mo’nn poudre mo figir ek mo dinite.
Mo pe bizin kanbre pou enn bouse manze,
Mo pa pe kone sipa loto ouswa bis-la ki pou pase.
Ou krwar enn plezir sa?
Komie kouma mwa koumsa inn bat ar bis…
Akoz enn bann gro vera, bann gro fat vis.
Maeva, Milazar, Cindy…
Fode inn ariv koumsa pou inn vinn vedet dan lagazet.
Pa krwar sipa pou al lapolis, sipa pou al lopital pou plengn douler ?
Prefer mo sarye mo sak lamerdman
Ki al ramas enn sak maltrete laba.
Bann sel maron ki’nn vinn dir mwa zot kontan mwa,
Zotmem ti vinn vann mwa.
Mwa, kan mo trouv mo de garson pe gardien tekwann pou ramas enn kas
Dan fon, bien dan fon mo leker mo pena la, mo fier.
Zot pa pe tal lame zot,
Zot pe travay, kantmem traser.
Dir seki to oule, parski isi nou ki traser.
Nou’nn grandi traser, nou’nn konn zis traser.
Ki ou get mwa koumsa ?
Ou ti donn mwa koudme pou sort ladan ou ?
Ou ti vinn get mwa kan mo ti andan ou?
Letan ? Ou ti ena letan ou? Alors ?!!!
Napa vinn dir mwa ki mo ti ena lot swa.
Napa vinn dir mwa ki mo ti oredi fer.
Napa vinn dir mwa koz ar leker
Sa… mo les sa pou fonnkézèr.
