Siziem Sans

Souvan de fwa mo asize mo imazine

- Publicité -

kouma lemond ti pou ete,

si nou tou ti kominike

dan enn langaz ki pena mo;

Si nou tou ti ferm lizie
lor seki dimounn inn apel
bann mankman ek bann defo…

Kapav lavi ti pou ena enn lot sans,

parski nou ti pou antrede pou dekouver

bote ki trouv dan enn siziem sans…

 

Ena boukou parmi nou ki grandi ek bann andikap,

ki li fizik ou bien mantal,

nou’nn aprann ki ve dir enn dimounn ki kapab.

Dan lekol, dan bis, dan travay,

zot pe zwenn le de bout,

mem si zot parkour ti’ena obstak oter montagn.

Dan lavi, dan lafami,

zot enn model pou bann ki pe monte,

parey kouma laliann ki file

pe inport ki oter to met so miray.

Etinsel zetwal dan zot lizie

zot briye dan tou domenn,

dan lar, dan langaz, dan matematik,

sirtou dan enn plas bien rar

kot koneksion imin li ankor dan enn form otantik…

Kouma enn larivier ki koule dan zot lavenn,

zot bann ledwa danse lor piano

pou donn nesans lamizik Beethoven…

Gras a zot palet ek pinso

zot inn met dislexi lor enn tablo,

ek nou tou rekonet li kouma Pablo Pikaso.

 

Avek enn vizion ki depas kapasite de lizie,

zot pla lamin fer konfians

vibrasion ki rezone dan limanite;

Zot pla lipie avanse ek enn klervwayans,
ziska ki antie lemond azenou devan bann prezize…

 

Les nou gide par zot de lizie,

parski nou si nou anvi sante

dan mem lesouf ki Jane Constance.

Les nou galoup deryer nou rev,

dan mem lelan ki Noemi Alphonse

parski se zot ki’nn montre nou

kouma met enn lanprint dan listwar.

 

Azordi, mo permet mwa ferm mo lizie,

pou ekout enn langaz iniversel

parski dan zot, mo’nn dekouver

plis ki zis lizie, lamin, lipie,

mo’nn dekouver, lazwa, trankilite ek krwayans;

Dan zot, mo’nn resanti bote enn siziem sans…

 

Text ekrir par Zainab Soyfoo pou Zourne Internasional bann dimounn ek enn handikap

 

- Publicité -
EN CONTINU ↻

l'édition du jour

- Publicité -