Zanfan Lanatir

Mo enn zanfan lanatir,

- Publicité -

mo’nn grandi dan later,

antoure ar pie, fey, fler,

lapli soley,

kourpa tang ek lever,

mo’nn aprann seki vre,

mo’nn aprann ki’ete labote.

Kan to get mo lipie

ranpli ar labou,

to dir ki mo enn zanfan mizer.

Me si to ferm to lizie ek get dan mo leker to pou trouve ena zis lazwa, trankilite ek boner…

Mo enn zanfan lanatir,

wi, mo enn zanfan lanatir,

mo’nn grandi bor lamer,

lapes kabo bor larivier,

antoure ek pwason, angi,

sevret, kamaron ek tilaplia,

mo’nn ale linz prop,

retourne linz sal,

gomon dan mo latet,

tilalae lor mo lalang,

Kan to get mo zar,

to apel mwa zanfan lakot,

koumadir enn erer ki mo papa peser,

ek mo mama lav linz larivier…

me si to bes to vwal,

vwal ego ek sosial,

to pou trouve ki dan mwa

larivier zwenn losean san okenn

laper ki pe atann mwa divan…

Mo enn zanfan lanatir,

wi! wi, mo enn zanfan lanatir,

mo seve nik zwazo,

mo latet dan niaz,

to pou trouv mwa galoupe dan karo,

pikan loulou ranpli lor mwa,

mo lake brinzel balanse 2 kote,

dan lwin mo tann mo mama kriye,

Zaaaaaaaiii!

Mo vini laaaaaa!

Huh! Kot mo ti vini?,

mo ti laba anba pie,

mo ti pe get kourpa akouple,

igwann fer sinema koumadir akter-aktris dan festival kann.

Ibiskis ti pe dans toupi

anba dan kwin kot zarikotann…

pou enn timama, mwasi mo ti anvi,

ki mo ti enn fler, enn fey, ou bien enn seni…

me mo nepli kas tet…

aster ki monn grandi, zot nepli apel mwa zanfan mizer,

zanfan lakot,

ena apel mwa enn fler,

ena apel mwa enn papiyon…

me seki pli zoli,

se kan mo pe dormi,

lalinn desann,

ansam ek tou zetwal…

ek zot dir…

twa, wi, wi, toi, to enn zanfan lanatir…

- Publicité -
EN CONTINU

l'édition du jour

- Publicité -