RAPHAELLE DOMINGUE
Mo finn ne lor enn lil
Mo zanset rakont lavi difisil
Mo lavi pa « enn kado”
San sapo mo travay dan karo
Mo mor dan so
Me mo pena repo
Sarye mo kalver lor mo ledo
Pena swa si mo anvi trouv tanto
Ala marenwar tonbe
Enn dife ki pou alime
Sakenn so dir lazourne
Pou evapore kan ravann sofe
Mo finn kre mo prop langaz
Mo ti kone li pou fer ravaz
Mo ofer mo desandans enn leritaz
Zenes fer li fer tapaz
Zordi enn nouvo zour
Me dimounn ankor sour
Malgre mo tap tanbour
Zot ferm mwa dan lakour
Mo vinn enn solda ater
Me seki lao-la konn so valer
Mo retrouv sime lalimier
Mo santi enn nouvo kourander
Mo finn rekile pou mie sote
Lao-la donn mwa drwa pou exprime
Pou mo kre enn nouvo lavenir
Enn zoli me dir lavantir
Mo langaz mama exsepsionel
So valer transdimansionel
So pouvwar konn linkondisionel
Mama li pli zoli ki larkansiel
Lotorite aprann servi to pouvwar
Pa tro panse to dan laglwar
Aret sof pou nanye to pa enn boulwar
Akoz Twa mo langaz viv dan nwar
Mo pou fer twa per kouma koulev
Malgre mo enn sinp zelev
Me selman mo ena enn rev
Pou fer mo langaz vinn enn sedev
Mo langaz ena so pwisans
Pa dout li donn li so sans
To koz li me selman to donn li penitans
Seki opouvwar aret fer rans
Seki dan parlman bien kontan pou kriye “VALER”
Tou kalite palab lor mo zanset so douler
Me eski zot konn viv dan sime lamizer?
Pa tap mo ledo pou to apel mwa “to frer »
—–
Mwa Raphaelle Domingue, mo enn pasione poezi depi mo etidie Kreol Morisien depi mo premie klas an primer. Mo remersie mo fami pou tou soutien ki zot finn aport mwa sirtou mo bann profeser KM ki finn touzour la: Mis Megan Rose ek Misie Ashvin Sembhoo.