Larout 197:
Rivierdegale – Porlwi,
Porlwi – Rivierdegale.
Seki kone, kone!
Mwa, lor bistop Rivierdezangiy,
enn lafoul koumadir bazar…
De bis inn pase pa’nn arete,
mo’nn fini anretar.
Mo priye bondie,
mo gagn lespwar,
enn bis resi arete:
Mo gagn pouse,
mo gagn enn kout koud.
Kan ariv mo tour pou monte,
kontroler dir zis sink dibout…
Mo dir li fer enn lizaz,
sinon mo perdi travay…
so leker saz,
li les mwa rantre…
Larout-la dife,
Sofer apiye,
Enn frin sek, zot tou baskile.
Pli devan,
lor bistop Rivierdipost, Rivierdragon,
pasaze lev lame koumadir pov diab,
sofer signale dir pena plas…
Devan inn ekrir 5 standing,
me 15 portmanto pe apandan,
bis la enn vre bwat sardinn.
Sa ler-la, kanmem mo lekor inn kwinse
ant kolonn ek Nicole,
sa bis lamem ti mo limouzinn…
Larout 197:
Pou retourn Rivierdezangiy,
mo al pran bis lagar Porlwi.
Vit-vit bis la ranpli,
Antretan enn bann pe tras zot lavi:
“pistas sale, gram bwi…
Apre li, ti’ena
“bonjour mesdames et messieurs,
navré de vous avoir dérangé”
lot la ti vann pistas,
sann-la, lastoplas…
Bis la fini ranpli,
Sofer met masinn anmars,
nou tou kone aster enn sel ale.
Ep! Enn kikenn ris sonet!
Sonet pa travay,
Madam kriye:
“Sofer arete!!”
Li pran sa bis la pou desann Pay,
to agase
parski twa twena pou al ziska Sirinam…
Redwi pa bizin dir,
trafik la jam,
zelev liniversite grinpe koumadir Spidermann
Pov kontroler, pa fouti tay kart,
retrouv li lokater dan so prop sekter…
Ariv Midlends,
enn ti lapli pe fwete:
zot tou pe ploye pe dormi,
zot reve pli bien ki lor zot lili.
Mwa’si mo ti soule,
fode ariv Tayak
kan bis la pile lor obstak
ki mo somey kase.
Mo lev latet depi enn gro lebra miskle,
Mo souy mo labav, mo dir sori misie.
Mo pa konn pou larout 109, 198, 200…
Me larout 197
Rivierdegale – Porlwi,
Porlwi – Rivierdegale
Pena drame, pena katakata,
Zot trase-koupe,
pou kit twa kot twa.
Azordi, mo tir sapo ar bann-la!
