JEAN JACQUES (ZANZAK) ARJOON
Enn teks ki baze lor « La critique dialectique » dapre Hegel
Enn lektir « La critique de la raison pure » de Kant
Baze lor metafor ki finn parodie lor « Discours de la méthode »
René Descartes
Inspire par demars Achille MBembé « Critique de la Raison Nègre »
Eh ou la! Kouma mo kapav dir mo enn kreol
Mo santi mwa plis morisien
Bizin arete avek sa bann zafer etnik la
Linn fini depase sa
Kouma dir Kreol la inn dir li pa morisien ?
Eh ou la! Kouma mo kapav dir mo enn kreol
Mo enn Metis mwa
Donk mo pa enn Kreol, mo metis sof kreol
Kouma dir Kreol la anti-metis ?
Eh ou la! Mo prefer dir mo enn afro desandan
Koumsa mo kone kot mo sorti, me mo melanze
Ek lerla sa pa remet an kestion mo lezot lapartenans
Kouma dir kreol pe rod dir li zis afrikin ?
Eh ou la! Monn ne lor enn later ki zeografikma afrikin
Finn deplas mwa depi enn pei ki lor later lafrik
Pou amenn mwa lor enn lot pei ki ousi lor later lafrik
Mo pa kreol mo afrikin
Kouma dir kreol pa afrikin ?
Eh ou la ! Monn ne dan zil mo enn kreol mwa
Dayer touseki ne dan zil kreol
A bon mo espere malbar, sinwa, laskar, blan, madras, marati aksepte zot kreol
Kouma dir kreol la ena kit problem ar res dan zil la ?
Eh ou la ! mo viv mo kreolite
Me mo pa kreol mwa
Nou bizin get dapre bann Martinike, bann aisien
Zouk masinn ek kasav
Alor kreol pa viv so kreolite ?
Eh ou la ! dapre seki mo pe trouve kreol pe ramas beze dan sa pei la
Mo bann anset pa afrikin
Me o nom lazistis mo kreol par defo
Mo kreol par opsion
Kouma dir kreol la li la par defo ek se enn kestion opsion ?
Eh ou la ! Mo popilasion zeneral mwa
Kouma mo kapav dir mo enn kreol zour eleksion
Koumsa mo pena okenn etni pou reprezante
Selma mo pou al poz kandida
Dan baz kot an Zeneral Popilasion la ….
Pourtan ek zot nou kapav ranpli bis
Fer bat djembe
Ek sant sega
Eh ou la ! Kouma mo pou dir mo enn kreol
Mo pa bann :
ki tous sali
Ki sant sega
Ki bat djembe ek ravann
Ki analfabet
Ki pa kapav met dan lakaz NHDC
Manzer tang
Manzer koson
Ki zis bwar, manze, bangole
Ki ranpli bis ek manz briyani pou eleksion
Mmmmmm!!!!!
Anfin enn bann repons
Negativma onet ek
Pozitivma ipokrit
Nou pe koumans trouv kler
Bann ki tous sali
Ki sant sega
Ki bat djembe ek ravann
Ki analfabet
Ki pa kapav met dan lakaz NHDC
Manzer tang
Manzer koson
Ki zis bwar, manze, bangole
Ki ranpli bis ek manz briyani pou eleksion
Alor si nou sey konpran
Se avek sa bann kalifikatif la ki definir KREOL
Korek omwin ena kreol dan Maurice
Parski mo ti konpran ki ena zis tou
Sof kreol
Alor dan Maurice
Nou ena Morisien
Nou ena Metis
Nou ena Afrodesandan
Nou ena Natif afrikin
Nou ena kreol parski ne dan zil
Nou ena kreol-Kreolite (style zouk ek Kassav)
Nou ena malbar, sinwa, laskar, madras, telegou, blan, bombay
Me Kreol mem
Selon definision
Negativma onet ek
Pozitivma ipokrit
Se bann ki :
ki tous sali
Ki sant sega
Ki bat djembe ek ravann
Ki konn zis zordi
Ki pa get dimin
Ki analfabet
Ki pa kapav met dan lakaz NHDC
Manzer tang
Manzer koson
Ki zis bwar, manze, bangole
Ki ranpli bis ek manz briyani pou eleksion
Pou donn lekzistans enn antite
Pena mie ki bann kalifikatif
Ek kalifikatif amenn enn lalinn ki dres ladiferans
Dan bann kalifikatif
Group la bien sible
Par bann :
Klise
Prezize
Stigmatizasion
Reze
Degou
Laont
Eksplwate
Imiliasion
Me o mwin bann kalifyer Kreol panse
E si zot panse vedir ki divan zot enn lekzistans
Ki zot mem pe definir
Zot pe donn sa lekzistans la enn sibstans potansiel
« Je pense donc je suis » René Descartes
Mo panse, alor mo la
Si nou transpoz fraz Descartes
Nou kapav dir sa
ZOT PANS LI
ALOR LI EKZISTE
OUBYIN SE PARSKI LI EKZISTE
KI ZOT PANSE
Aster la
Zot finn abiy li avek enn lot manto
Ki apel katolik ?
Mo krwar Kreol ena problem ki apel li Katolik
Me Selma eski pe apel li katolik pou pa ofans li ?
La kot li vinn enn ofans
Se kan nou bliye ki :
Ena malbar katolik
Ena sinwa katolik
Ek blan katolik
Eski malbar katolik la kreol?
Eski sinwa katolik la kreol?
Eski blan katolik la kreol?
Finalman kan nou get bien
Se otour so negasion
Otour enn manyer dir li lor baz enn devinet
Setadir enn zefor pou dir li dan bann gran prinsip federater
Tel :
Morisien,
Metis
Afrodesandan
Natif afrikin
Kreol dapre model aisien
Kreol zilwa
Kreol par opsion
Kreol katolik
Popilasion zeneral
Kreol dapre enn definision
Negativma onet
Pozitivma ipokrit
Se otour tousala ki Kreol fini par pran form
Tou seki revandik enn lot kiksoz ki Kreol
A okenn moman zot pann nie lekzistans kreol
Dan enn sertenn fason a fors sey rod pa dir li
Ki zot fini par dir li
A fors rod minimiz li dan enn prinsip pli federater
Zot fini par rekonet ki li la
Parski prinsip federater la li mem
Viv lor enn kondision ki pa kapav renie
San sa kondision la li nepli enn prinsip federater
Parski a la baz li rod feder ki zafer
Enn varyete antite
Ek nou pou remark byin
Ki bann ki ena enn rapor direk avek kreol
Ki prefer rant dan prinsip federater
Li lezitim ek vre sa
Me si nou al ziska dan bout
Zot pozision konfirm lekzistans kreol
Fode mare nwar
Pou lalimyer kapav fer so lefe (Kaya)
Me kan nou get o fon bann zafer
Nou trouve ki lalimier res enn realite virtiel
Alor ki marenwar res konstan
Seki vedir ki nou kapav tegn lalimier
Me nou pa kapav tegn marenwar
