Kan limanite ti vinn lor later,
li ti enn milti-miliarder…
So zepol ti larz,
so leker ti gran,
so regar zovial,
Li ti touletan devan-devan.
Lamizer par kont,
li ti fer ale-vini,
parski kan limanite ti prezan,
lamizer pa ti gagn lavi.
Me ale-ale,
Limanite inn perdi valer,
li’nn depresie,
kan mem komien li ena,
zame li pa ti pe trouv ase.
Azordi, limanite inn telman apovri,
ki lamizer inn anprizone dan kat kwin pei.
Li nepli pasazer,
li permanan, li eriditer,
li pa kone kouma pou sorti depi ladan.
Dan nou lizie,
li loze anba bistop,
dan Kirpip, dan Sodnak.
Anba nou lipie,
li grandi bor lakot,
dan Rivier Nwar, dan Pwintosab.
Nou tou konn li dan site,
dan lakir, dan malerb.
nou get li kouma enn maladi kontazie,
enn movezer,
ki si li tous ar nou, nou pou kontamine.
Wai, lamizer li kapav pov,
me limanite, li’nn vinn enn vre mizerab.
Ledo tourne, leker sele,
lamizer inn kondane
pou tourn an ron dan selil so destine.
Lanwit, lizour,
li priye ki enn kikenn pou tann so zistwar,
pa pou donn li enn bie sinpati,
ou bien enn pla briani,
me pou mars pieni dan soulie enn sanzabri,
pou resanti so soufrans,
pou konpran komien koulou pers so pla lipie
avan ki li resi gagn mem lasans.
Lamizer atann ek enn labouzi rouz
ki limanite pou vini pou diminie so santans.
Avan ki to pwint li ledwa,
kone ki lamizer pa’nn swazir so sor,
Li pa deranz twa gramatin-tanto
pou vinn tap to laport.
La plipar letan, li pe kasiet figir,
parski li onte pou demann enn sipor.
Dernie fwa ki mwa mo ti trouv lamizer,
li ti dan form enn ti garson dan lekol,
Trankil dan so ti kwin,
so prezans pa ti deranz personn.
Kan mo demann li si li’nn manze,
li fer enn mari sourir,
li dir mwa, “non… zordi mo pa pe gagn fin…”
Zot ankor rapel kan limanite ti vinn lor later?
Li ti enn milti-miliarder…
Azordi limanite li zis enn fasad;
an realite, li’nn komet bann krim
ki lamizer pe bizin peye.
Lamizer li kapav pov,
Me limanite,
li’nn vinn enn vre mizerab.
ZAINAB SOYFOO
