Moonsamy SUNASSEE
Degoute par koripsion
Ki pe anvayir lanasion
Ronze par nepotism
Avek so koroler favoritism
Kan par tro inzistis
Pei pe al dan presipis
Kan a la tet bann institision
Ki sipoze bizin asir nou proteksion
Dimounn les zot aprivwaze
San respe zot prop dinite
San zot sousie zot de zot prop lopinion
Zot les zot gide par larzan ek pozision
Galoup deryer larzan, se zot pasion
Ki ranplas lamour ek la konpasion
Kan enn lepep kriye so dezespwar
Avek enn linflasion kouma enn lam razwar
Kan partou pri pe sot mouton
Ki fer dimounn gagn frison
Mo dir lepep pa perdi lespwar
Pa bes lebra, me kontign krwar
Ki ena dimounn ankor onet
Ki larzan pa pou detourn zot latet
Ki ankor kapav soumet zot demision
Olie fer konpromision
Ki zame pou abandonn zot valer
Mem si zot bizin soufer
Pa perdi lespwar
Enn zour pou ena enn pouvwar
Ki pou tir nou depi dan marenwar.
