Ena ennta dir ki zot sagrin ki zwe lontan nepli existe.
Me kontreman a seki zot panse, 
zwe lontan pa’nn disparet.
Me kouma tou ki seki finn evolye,
li si li’nn pran enn nouvo faset.
Kas kas nikola, dan ki labarb? Drwat!
Pa dan lamin drwat.
Kas kas nikola, dan ki labarb? gos!
Pa dan lamin gos.
Kas kas nikola, mwa ki pli malin.
kan to pa pe gete,
tou inn devers dan mo pos…
Non, non, non, mo pa zwe voler
mo’nn zis met bann nouvo lalwa
parski dan sa zwe la
mo panse mwa ki lerwa…
Board monopoli lor latab,
Nou tou pe atann nimero 6-6-6 pou sorti.
Me mwa ek twa nou pa ase onorab
alor kas sal pe pas soutapi.
Kan mem komien zwer ena ki kapab
zot pe kontign zwe sa zwe-la zis ant fami.
Lisans labank dan enn sel so lamin
nou peizan pena swa
apart ferme dan bwat kondane.
Blansiman larzan dan enn marse nwar
fode get kalite lor model masinn-a-lave.
Dobi de klas nepli bor larivier
me pie dan lo dan propriete prive.
Sa fer mwa rapel Venezuela an 2010:
Kan kas-kas nikola kre enn financial crisis.
Mais ici invitation ouvert à tous:
Venez zwe-la, Venez zwe ici à Moris,
avek zwe ki legal, “tout devient possible”.
Me rapel dan tou zwe ena enn zour
kot zot prop zwer pou vire.
Nou bien kone, fami pa fami,
ariv enn ler kot board monopoli pou devire.
Kan enn terin anba-lao,
pa drol ki to trouv zot koumans tir fizi-delo.
Polis-voler nepli zwe li dan fatak,
zot zwe li okler,
koumsa nou pa gagn letan dir
ki tousala zis enn arnak.
Tou viktim pe priye pou lazistis
be kisann-la nou pou fer konfians lor sniffing
kan partou zot inn met lisien pou vey sosis.
Kafouyaz lor la scène du crime,
tou lanprint pe pwint lor zot prop lapis.
Kas kas nikola, dan ki labarb? _____
Kas kas nikola, dan ki labarb? _____
Zwe lontan kan inn evolye,
li kapav inn sanz faset.
Nou peizan kapav inn vinn malere,
me pa ve dir nou’nn vinn malonet…
Alor nou pe atann pou zwe
ar tou bann ki’ena gro biye,
parski nou tou ki la ena
pou retourn zot zot lamone sanze!
Text performed for the 12th round on 29 July 2023 at Bo’Valon Mall by Zainab Soyfoo: Winner of Slamleague 2022-23
“The journey of Slamleague 2022-23 has come to an end. From the texts ‘Zanfan Koltar’ to ‘Kas Kas Nikola’, the ride has been challenging, yet enriching.
A great shoutout to Slam.mu for setting such an influential platform to give a voice to people of all age. The organisation has pushed participants to develop consistency in their writing, and discipline in their approach. I admire all the participants for their unique creative styles, especially to the ones who took their first step beyond their comfort zone.
I am utterly thankful to all my friends, family and the many fans who stood as psychological pillars throughout. The presence and support of Urvesh, Karishma, Kratijah and members of Aurora Toastmasters Club made a lot of difference.”
