Natir imin koumsa
Pou lezot sa, pa pou mwa
Pa konpran so vre gravite
Tan ki nou pa touse
Avan sa, tou ti korek
Bann labitid, bann reflex
Nou ti afon dan nou trin-trin
Insousian dan nou kotidien
Nou ti viv vit, me leze
Ti ena rev ek proze
Perspektiv lafin
Enn kosmar bien lwin
Fami, travay, pei
Ti roul lekonomi
Nou lenerzi sakrifie
Lor non prodiktivite
Apre, enn zour, deboulman
Pa donn letan konpran
Panik, mefians, tansion
Nou’nn perdi larezon
Enn klima glase dan lete
Nou ti dan traka landime
Dan nou regar, laper
Boss ti dir, nou an-ger
Koze ti pe galoupe
Pa kone ki pou ekoute
Rimer, mansonz, manigans
Nepli ti ena konfians
Ti ena enn lennmi isi
Ansam, nou’nn swazir sov lavi
Kikpar nou’nn bizin inn fane
Nou’nn sape, nou bizin sanze
——–
Ki zafer ki vre isi ?
Ki zafer ki pa manti ?
Seki nou leker kontan ki konte,
Seki nou leker resanti.
Ki zafer ki vo lapenn ?
Ki serti ena laenn ?
Eski an vre nou pa parey ?
Ena mem lanvi kas lasenn ?
Ki vremem merit latansion ?
Kot nou pe ale, dan ki direksion ?
Laba mem nou anvi ale ?
Eski nou sir destinasion ?
Ki nou finalite ?
Pou ki rezon nou’nn ne ?
Eski nou’nn gagn enn mision ?
Oubien nou zis respire ?
Isi, ki nou’nn vinn fer ?
Ki nou rol lor later ?
Eski ena enn gran desin ?
Vremem sa ? Paradi ? Lanfer ?
Oubien tou zafer koinsidans,
Probabilite, azar, lasans ?
Nanye pa existe,
Ni boner, ni soufrans ?
Ek si pena nanye pou konpran ?
Si tou seki existe, nean ?
Si nou san gravite ?
Si nou insinifian ?
Touy lekor pou ki fer profi ?
Pou limanite, fer piti ?
Ki nou été ?
Ki sans lavi ?