Amenn to plim,
mo donn twa enn paz,
pa pou fer rim,
pa pou fer slam,
me pou ekrir
kouma enn sel lepep,
enn sel nasion,
pase nou zanset
ek fitir nou zanfan.
Mo met enn let,
to met enn lot,
mo fer bann mo,
to fer bann fraz,
nou les li file,
kouma enn laliann,
ki desann vale,
pou al lor montagn…
Nou konstrir,
pa ek trwa blok,
me ek enn lekritir
ki so rasinn ankre
dan nou later, nou laplaz
nou kiltir, nou langaz…
Nou les li grandi
kouma enn pie
ki so bann brans
tini bann zwazo,
parski ena tro boukou lespri
inn anferme dan bann kaz…
Azordi si anba nou lipie ena
glisman terin,
ek disab nou laplaz pe glise
depi nou lamin,
Se Moris pe bizin twa
ek tou morisien…
Vir paz ansam ar mwa,
nou get par deryer,
nou aprann nou listwar…
non pa enn zistwar invante,
pa enn sirandann…
me enn seki vre,
enn ek tou so patrimwann:
Rakont mwa ravann sega,
me pa bliye rakont mwa
lamor Kaya.
Rakont mwa sato
disab dan Bloube,
san ki to bliye tou laplaz
ki nou’nn vande.
Rakont mwa nou
lindepandans le 12 mars,
San ki to bliye sagosien
ek zot penitans.
Amenn to plim,
ekrir enn paz ansam ar mwa,
enn lor to lexistans
enn avek to prop lexperyans.
Koz li dan to langaz,
enn ki to pou konpran,
enn ki pou fer twa poz kesion:
Kan? Kotsa? Kouma? Kifer?
Anou fer fas laverite,
ek tou so dimal,
ek tou so bote….
Montre mwa to sikatris
Ki’nn forme par bann prezize
Ki’nn flanbe par bann prezidis…
Kan tou nou lavwa pou rezone,
lerla ki nou pou diboute ansam
pou dir ki Moris dan nou leker
ek kat kouler dan nou levenn.
Vini kouma tw’ete,
san baryer, san laenn,
lerla nou pou dir
wi, mwa ek twa
pa fer de, pa fer trwa.
Wi, mwa ek twa fer enn…
Zainab Soyfoo
