Ti gout dilo zwenn
Pou reyni rekin, pwason,
dofin ek labalenn.
Twa ki to pe atann
pou zwenn ti lagrin disab
pou konstrir enn ti sato?
Pa ezite pou to demann bann krab
pou ed twa ranz enn ti bato.
Larg to lekor dan losean liniver,
les labriz pran twa ale
ziska zwit donn twa bann perl…
Kan twa ek lamer vinn enn,
pena rwayom,
pena larenn,
ena zis larmoni
ki grandi dan enn lasirenn…
Kat-sink kouler zwenn,
pou fer enn peisaz ek kann,
koko, mang, leksi ek longann.
Ki so tipti,
ki so gran,
antie lemond arete
kan soley fann an de
pou ki zonn melanz ek tirkwaz.
Twa ki to pe atann
pou fer enn tablo, enn kanva,
enn desin ki to penn ar to ledwa.
Pou enn timama,
bliye Da Vinci ek Pikaso
me retourn twa kot sa zanfan
ki’nn fek dekouver palet ek pinso.
Dimin kan mo krwaz to simin,
mo pou partaz ar twa tou seki niaz inn dir mwa
ek mo pou atann ki to pou reponn mwa
dan mem langaz ki nou ti koze
avan mem ki nou ti dan vant mama.