Letan lontan
margoz
Letan aster
Grandioz
Mo papa rakonte
Ki manier
Dan sa letan-la
Ti bizin fer devwar avek lalimier kolonn/fanal
So papa li, li rakonte kouma labrez ti donn lekleraz
Pou kapav tras let alfabet lor kaye devwar
Sa letan-la finn fini traverse
Letan lontan
Margoz
Letan aster
Grandioz
kan koz sa letan koz sirtou profeser
Kan de kamarad lekol primer zwenn
Enn kestion ki revini ankor ek touletan
“To rapel Miss? To rapel Monsieur?”
Enn lekleraz lor vizaz
Mem si rotin bazar ti vinn gat sa kont de fe la ena fwa
Letan lontan
Margoz
Letan aster
Grandioz
Mem si sa letan-la, teknolozi pa ti ankor avanse
Zanfan ti ena respe pou saki ti trap zot lame pou montre lir ekrir konte
Aster-la tousa finn sanze
Manier, respe napli anvole dan lezer
Napli existe dan zanfan zot vokabiler
Letan lontan
Margoz
Letan aster
Grandioz
Aster-la malgre bel bel avanse dan ICT
Zanfan lev lavwa dan klas
Violans partou kote
Sa fer nou dimande:
Eski nou pe avanse ouswa rekile?
Aster-la malgre lintelizans artifisiel
malgre tou bel bel gadget
Nou bizin pa bliye esansiel
Remet imin osant klas
redonn metie profeser so let nobles
lerla kifwa lavenir pou meyer
Letan lontan
Margoz
Letan aster
Grandioz
Kavinien Karupudayyan